शान्ति मिसनका लागि नेपाली सैनिक असार २४ मा अफ्रिका जाँदै

News

१८ असार, काठमाडौं । कोरोना महामारीकै बीच नेपाली सैनिक संयुक्त राष्ट्र संघको शान्ति मिसनका लागि सेन्ट्रल अफ्रिकन रिपब्लिक र माली जाने भएका छन् । शान्ति मिसनका लागि खटिने नेपाली सेनाका अधिकृत र जवानलाई लिएर नेपाल एयरलाइन्सको विमान असार २४ गते ती दुई देशमा पुग्नेछ ।

यी दुई मुलुकमा हुने उडानका सम्बन्धमा नेपाली सेना र नेपाल एयरलाइन्सबीच बिहीबार सम्झौता भएको छ । सम्झौता अनुसार दुबै उडान ८ जुलाई अर्थात असार २४ गते नै हुनेछ । नेपाल एयरलाइन्सका अपरेशन विभाग प्रमुख दीपु ज्वार्चनका अनुसार नेपाल एयरलाइन्सको वाइडबडी जहाज काठमाडौंबाट सैनिक लिएर सुरुमा कतारको राजधानी दोहा पुग्नेछ ।
त्यहाँ इन्धन थप गरी जहाज सेन्ट्रल अफ्रिकन रिपब्लक पुग्नेछ । नेपालबाट गएका केही सैनिक त्यहाँ झर्नेछन् भने केही सैनिक लिएर विमान फेरि माली पुग्नेछ । मालीमा सैनिक झारेपछि विमान काठमाडौं फर्किनेछ । यसअघि नै शान्ति मिसनका लागि ती देशमा पुगेका नेपाली सैनिक सोही विमान चढेर स्वदेश फर्किनेछन् । ती मुलुकबाट नेपाल फर्कन सैनिकको संख्या भने ५/६ जना मात्र रहेको बताइएको छ ।

यो उडानलाई कम्पनीले चुनौती र अवसर दुबै रुपमा लिएको नेपाल एयरलाइन्सको भनाइ छ । काठमाडौं । कोरोना (कोभिड-१९) भाइरसका कारण रोकिएको संयुक्त राष्ट्र संघको शान्ति मिसनको ‘रोटेसन’ अब सुरु हुने भएको छ । यूएन मिसनले नेपाली सेनालाई बदली गर्नुपर्ने फौज तयारी अवस्थामा राख्न भनेको हो । जसअनुसार पाँचखालस्थित वीरेन्द्र शान्ति कार्य तालिम केन्द्रमा एक हजार सैनिक अधिकारीलाई क्वारेन्टिनमा राखिएको छ ।

जंगीअड्डाका एक सैनिक अधिकृतका अनुसार यूएनले सैनिक अधिकृत र कर्मचारीलाई कोरोना भाइरसको परीक्षण गरेर मात्र पठाउन भनेको छ । त्यसका लागि नेपाली सेनाले पीसीआर मेसिन खरिदको तयारी पनि थालेको छ । छाउनीस्थित सैनिक अस्पतालमा राख्ने गरी अत्याधुनिक स्वचालित मेसिन खरिद गर्न लागिएको जंगीअड्डा स्रोतले अनलाइनखबरलाई बतायो ।

यसका लागि सेनाले पहिलो पटक आह्वान गरेको टेण्डर रद्द भएको छ र दोस्रो पटक पुनः टेण्डर खुलाउन लागिएको छ । परीक्षणका लागि आवश्यक पीसीआर किट, पर्सनल प्रोटेक्टिभ इक्यूपमेन्ट (पीपीई) लगायतका सामग्री नेपालस्थित अमेरिकी दूतावासले जंगीअड्डालाई सहयोग स्वरुप हस्तान्तरण गरेको छ ।

बुधबार नेपालका लागि अमेरिकी राजदूत र्‍याडी बेरीले जंगीअड्डामा आयोजित एक कार्यक्रमका बीच ४ लाख ५० हजार डलर बराबरको स्वास्थ्य सामग्री हस्तान्तरण गरे । स्वास्थ्य सामग्री लिएपछि प्रधानसेनापति महारथी पूर्णचन्द्र थापाले अमेरिकाको सहयोग प्रति धन्यवाद व्यक्त गरे । जुलाई पहिलो साताबाट फौज फेरिँदै सैनिक स्रोतका अनुसार अब एक सातापछि जुलाईबाट यूएन मिसनको फौज परिवर्तन गर्ने तयारी छ ।

यसअघि कोरोना भाइरसका कारण दक्षिण सुडान उड्ने तयारीमा रहेका ६९९ सैनिक अधिकारी नेपालमै रोकिएका थिए । सुडान उड्ने अन्तिम तयारीमा फौज रहेका वेला कोरोनाको बढ्दो महामारीलाई कारण देखाउँदै संयुक्त राष्ट्र संघले नयाँ फौज नपठाउन जंगीअड्डालाई पत्राचार गरेको थियो ।

अब उनीहरुसहित कंगोका लागि ५६, मालीमा एक सय ३८ र लिबियाका लागि २ सय ३० जनाको फौज जाने तयारीमा छ । यूएनको विमान नआउने अहिले मिसनमा जाने तयारीमा रहेका अधिकारीहरुको भिसा लगायतका प्रक्रिया जारी छ । तर, संयुक्त राष्ट्र संघले आफ्नो विमान भने नपठाउने जनाइसकेको छ । नेपाली विमान चाटर्ड गरेर पठाउन भन्दै यूएन मिसनले ‘लेटर अफ एसिस्टेनस’ पठाएको छ ।

त्यसवापत लाग्ने खर्च भने यूएनले नै व्यहोर्नेछ । ‘नेपाल एयरलाइन्सको वाइडबडीमा पठाउने तयारी गरिरहेका छौं’, एक सैनिक अधिकृतले अनलाइनखबरसँग भने, ‘प्राइस लिस्ट पठाउने प्रक्रिया थालिसकेका छौं ।’ कोरोनाका कारण दक्षिण सुडान जाने तयारीमा रहेका नेपाल प्रहरीका १८ अधिकृत पनि रोकिएका थिए । सशस्त्र प्रहरीमा भने तत्काल कुनै पनि टोलीको बद्ली गर्ने समय आएको थिएन ।

Leave a Reply

Your email address will not be published. Required fields are marked *